एजेन्सी । एट्लेटिको मड्रिड स्पेनिस ला लिगा फुटबलको शीर्ष स्थानमा उक्लिएको छ ।

आइतबार राति भएको खेलमा रियल बेटिससँग १–१ गोलको बराबरी खेल्दै एट्लेटिको शीर्ष स्थानमा फर्किएको हो ।

बेटिसको मैदानमा सुरुवाती गोलको अग्रता जोगाउन नसक्दा एट्लेटिको बराबरीमा रोकिएको हो ।

खेलको पाँचौ मिनेटमा यान्निक कारस्कोले गोल गर्दै एट्लेटिकोलाई १–० को अग्रता दिलाएका थिए ।

तर, खेलको २० औं मिनेटमा बेटिसका क्रिस्टियन टेलोले गोल गरेपछि एट्लेटिको १–१ गोलको बराबरीमा रोकिन बाध्य भयो ।

यस बराबरीसँगै एट्लेटिको रियल मड्रिडलाई १ अंकले पछि पार्दै शीर्ष स्थानमा उक्लन भने सफल भएको छ ।

एट्लेटिकोले ३० खेलमा ६७ अंक जोडेको छ । रियलको ६६ अंक रहेको छ । रियल बेटिस ४७ अंक जोडेर छैटौं स्थानमा रहेको छ ।