एजेन्सी । इंग्लिस क्लब म्यानचेस्टर युनाइटेडले युरोपा लिग फुटबल अन्तर्गत क्वाटरफाइनलको पहिलो लेगमा सहज जित निकालेको छ ।

बिहीबार राति भएको खेलमा युनाइटेडले स्पेनिस क्लब ग्रानडालाई २–० गोल अन्तरले पराजित गरेको हो ।

ग्रानडाको मैदानमा युनाइटेडलाई जित दिलाउन मार्कस राषफोर्ड र ब्रुनो फर्नान्डेसले एक एक गोल गरे । खेलको ३१ औं मिनेटमा रासफोर्डले गोल गर्दै युनाइटेडलाई १–० को अग्रता दिलाए ।

त्यसपछि खेलको इन्जुरी समयमा ब्रुनो फर्नान्डेसले पेनाल्टीमा गोल गर्दै युनाइटेडलाई २–० को जित दिलाए । यस जितसँगै युनाइटेडले सेमिफाइनलमा पुग्ने सम्भावना बलियो बनाएको छ ।

ग्रानडालाई भने दोस्रो लेगमा फराकिलो जित निकाल्नु पर्ने भएको छ । युनाइटेडको मैदानमा हुने दोस्रो लेग अप्रिल १६ मा हुने छ ।