काठमाडौं । रोजगारीका लागि साउदी पुगेर अलपत्र परेका नेपालीहरूको उद्धार कार्य जारी छ । हालसम्म नेपाल एयरलाइन्स र हिमालय एयरलाइन्सलले समस्यामा परेका नेपालीहरूको उद्धार उडान गर्दै आएका छन् ।

साउन ५ गतेदेखि उक्त दुई एयरलाइन्सले साउदीको दमामबाट उडान गर्ने साउदीमा रहेको नेपाली राजदूतावासले जनाएको छ । स्वदेश फर्कने नेपालीहरूको सूची नेपाल सरकारले निर्धारण गरेको प्राथमिकताका आधारमा दूतावासले तयार गरी नेपाल एयरलाइन्स र हिमालय एयरलाइन्सको आधिकारिक सम्पर्क व्यक्तिसमक्ष पठाइएको छ ।

यसअघि विभिन्न मितिमा प्रकाशित सूचीमा नाम परेका तर हालसम्म स्वदेश फर्किन नसकेकाहरू भने प्राथमिकता सूचीमै रहने दूतावासद्वारा जारी विज्ञप्तिमा जनाइएको छ ।