काठमाडौँ । केहि दिनदेखि परेको अविरल वर्षाका कारण आएको बाढी र पहिरोमा परी लमजुङमा १४० घरपरिवारका ५ सय जना र सिन्धुपाल्चोकमा ६७ घरपरिवारका सदस्यहरु विस्थापित भएका छन् । सिन्धुपाल्चोकका प्रहरी प्रमुख (एसपी) प्रज्वल महर्जनका अनुसार भौगोलिक विकटताका कारण बाढी र पहिरोमा परेकाहरुको उद्धारमा अझै कठिनाई भएको छ ।

अहिले सम्म हराइरहेका २२ जना नभेटिएको र उद्धारमा गम्भिर भएर लाग्दा पनि भौगोलिक अवस्था कठिन भएकाले हराएकाहरुलाई भोटेकोशीले बगाइसकेको अनुमान गरिएको महर्जनको भनाई छ । उहाँले नदिको तटीय क्षेत्रहरुमा पनि खोजिभइरहेको र बाह्रबिसे सम्म सडक खुलेको भन्दै भोटेकोशी क्षेत्रमा हेलिकोप्टरबाट राहत वितरण भइरहेको नेपाली रेडियो नेटवर्कलाई बताउनुभयो ।

उता, लमजुङमा पनि १४० घरका ५ सय हाराहारीलाई सुरक्षित स्थानमा सारिएको छ । लमजुङ जिल्लाका प्रमुख जिल्ला अधिकारी कृष्णप्रसाद शर्माले नेपाली रेडियो नेटवर्कलाई दिएको जानकारी अनुसार अहिले पनि घरको तलबाट र माथिबाट पहिरो जाने खतरा रहेकाले ५ सय हाराहारीलाई अन्यत्र सारिएको हो ।

राहतमा अहिले कुनै समस्या नभएको र उद्धारमा बिशेष ध्यान दिएको भन्दै शर्माले पुनःस्थापनको लागि दिर्घकालिन योजना चाहिने भएकाले अहिले जाखिममा रहेकाहरुलाई सुरक्षित ठाउँमा पुर्याउने काम भइरहेको बताउनुभयो ।