काठमाडौं । लोक तथा दोहोरी गायक रत्न बानियाँको निधन भएको छ । गायक बानियाँको दुवै मृगौलाले काम गर्न छाडेपछि ओम हस्पिटलमा उपचारार्थ हुनुहुन्थ्यो । उहाँको आज विहान ३ बजे निधन भएको पारिवारिक स्रोतले जनाएको छ ।

गायक बानियाँको ‘लडाईँ​को लाहुरे, पानमा सुपारी, बिन्ती छ निष्टुरी, यति राम्रो झिल्के, स्याङ्जा दहथुम, कहाँबाट आयो पापी काल लगायतका दर्जनौं गीत अझैपनि चर्चामा छन् ।

राष्ट्रिय लोक तथा दोहोरी गीत प्रतिष्ठान नेपालका आजीवन सदस्य समेत रहनुभएका उहाँले लामो समयदेखि झरना संगीत संचालन समेत गर्दै आउनुभएको थियो ।

बानियाँको आजै पशुपति आर्यघाटमा दाहसंस्कार गरिएको छ । दाहसंस्कार अघि बिहान पशुपति आर्यघाटमा स्वर्गीय बानियाँको पार्थीव शरीरमा श्रद्धाञ्जली अर्पण गरिएको थियो ।

लोक गायन क्षेत्रमा वर्षौदेखि सक्रिय उनको निधनमा नेपाली लोक तथा दोहोरी गीत प्रतिष्ठान, विभिन्न कलाकारहरुले दुःख व्यक्त गर्दै श्रद्धान्जली दिइरहेका छन् ।