काठमाडौं । विगतका वर्षहरु जस्तै यस वर्ष पनि नुवाकोटका विभिन्न भेगमा भव्य रुपमा गोरु जुधाइदैं छ ।

हरेक वर्ष माघे सङ्क्रान्तिका अवसरमा गोरु जुधाइदैं आइएकोमा कोरोना महामारीको प्रकोपमा पनि नुवाकोटमा गोरु जुधाइ हुने भएको छ ।

चार स्थानमा मेलासहित ४० हल गोरु जुधाउने कार्यक्रम तय भएको छ । तारकेश्वर गाउँपालिकाÐ३ चन्दनीमा भव्य मेला आयोजना गरिएको छ । चन्दनीमा यस वर्ष २२ हल गोरु जुध्जे छन् ।

विदुर नगरपालिका १० वेत्रावतीमा ५ हल, शिवपुरी गाउँपालिकाको शेराबगरमा ७ र पञ्चकन्या गाउँपालिकामा ६ हल गोरु जुधाउने तयारी गरिएको छ ।

गोरु जुधाइबारेका अनेक कहानी
हरेक वर्ष माघेसंक्रान्तिको दिन तारुकामा गोरु जुधाइ हुन्छ । गोरु जुधाइबारे धेरै कहानीहरू छन् । त्यसमध्ये किसानहरूको पौरख प्रतिबिम्बित गर्ने क्रममा कसको गोरु बलियो भनेर प्रदर्शन गर्ने बताइन्छ ।

त्यस्तै, अर्को कहानी अनुसार राजा जयपृथ्वीबहादुर शाह १० वर्षको हुँदा काठमाडौंको जाडो छल्न आमासँग मामाघर तारुका पुगेका थिए । मामाघरमा भान्जाभान्जीलाई झोलीको देउता भनिन्छ ।

उनै झोलीका देउतालाई मामाघरमा माघेसंक्रान्तिका दिन गोरु जुधाएर मनोरञ्जन गराइएको र त्यसयता तारुकामा यो चलन चल्दै आएको मान्यता पनि छ ।

वि.सं. १८४९ मा तिब्बती सेना र नेपाली सेनाबीच वेत्रावतीमा सन्धी भएपछि त्यसको खुसियालीमा गोरु जुधाएर रमाइलो गर्ने चलनको थालनी भएको पनि अर्को कहानी छ । तर, यसैवेला देखि गोरु जुधाउन सुरु भएकोे भन्नेबारे अभिलेख भने अहिलेसम्म फेला परेको छैन ।

पशु हितमा छैन
पशु अधिकारकर्मी प्रमदा शाह यस्तो क्रियाकलाप पशुको हित विपरित भएको बताउनुहुन्छ ।

विगत ८ वर्षदेखि गोरु जुधाइको विरोध गर्दै आएपनि हालसम्म केही परिवर्तन हुन नसकेको उहाँको भनाइ छ । विगतमा राजालाई देखाउन यस्ता चलन चलेपनि अब समय फेरिएको र परम्परा जोेगाउने नाममा यस्ता क्रियाकलाप पूर्ण रुपमा रोक्नुपर्ने उहाँले बताउनुभयो ।