काठमाडौं । विश्वको सर्वोच्च शिखर सगरमाथाको उचाइ आज सार्वजनिक गरिँदै छ । नापी विभागका अनुसार नेपालले आफ्नै जनशक्ति र प्रविधिको प्रयोग गरी चीनसँगको संयुक्त टोलीमा सगरमाथाको उचाइ मापन गरेको हो ।

सर्वेक्षणबाट प्राप्त प्रतिवेदन आज नेपाल र चीन दुवै देशका सहमतिमा एकैपटक सार्वजनिक हुने विभागले जनाएको छ । यसअघि एकैपटक सार्वजनिक गर्नका लागि नेपाल सरकारले गरेको प्रस्ताव चीन सरकारले स्वीकार गरेको छ ।

दिउँसो करिब दुई बजेतिर नापी विभागमा नेपालतर्फबाट उचाइ सार्वजनिक हुनेछ । यसका लागि सम्पूर्ण तयारी पूरा भइसकेको नापी विभागका सूचना अधिकारी दामोदर ढकालले जानकारी दिनुभयो ।

दुवै देशले छुट्टाछुट्टै साधन र स्रोत प्रयोग गरी सगरमाथाको उचाइ मापन पूरा गरेका छन् । करिब २ वर्षअघि विभागले सगरमाथाको उचाइ मापन गर्न सुरु गरेको थियो ।