काठमाडौं । काठमाडौं–मुग्लिन सडकखण्डअन्तर्गत धादिङमा ठूलो पहिरो खसेको छ । बेनीघाट रोराङ गाउँपालिका–१०, जवाङ खेलानजिकै पहिरो खसेको जिल्ला प्रहरी कार्यालय धादिङले जनाएको छ । पहिरोका कारण सडक दुईतर्फी अवरुद्ध भएको छ । पहिरो पन्छाउन समय लाग्ने धादिङका डीएसपी सुवास हमालले जानकारी दिनुभयो । 

जिल्ला प्रशासन कार्यालय धादिङका अनुसार अहिले पहिरो पन्छाउने कार्य जारी छ । पहिलो पन्छाउन कम्तीमा ५ घण्टा लाग्ने अनुमान गरिएकाले अपरान्ह् तीन बजेसम्म सडक अवरुद्ध हुने जिल्ला प्रशासन कार्यालय धादिङले सुचना मार्फत जानकारी गराएको छ। साथै प्रशासनले मलेखु धादिङबेशी आरुघाट मध्यपहाडी राजमार्ग, गोरखा हुँदै आबुखैरेनी, मध्येपहाडी राजमार्ग हुँदै डुम्रे लगायतका बैकल्पिक मार्ग प्रयोग गर्न आग्रह गरेको छ । 

सडक अवरुद्ध हुँदा वरपर सयौँ सवारीसाधन बीचबाटोमा रोकिएका छन् । काठमाडौं भित्रने र बाहिरिने मुख्य सडक अवरुद्ध हुँदा यात्रु समस्यामा परेका छन् ।