काठमाडौं। मुग्लिन–नारायणगढ सडकखण्डमा यात्रु वस दुर्घटनामा परेको छ । नेपालगञ्जबाट काठमाडौँ आउँदै गरेको बस दुर्घटना हुँदा २५ जना घाइते भएका छन् ।

आज बिहान साढे ४ बजे नारायणगढ–मुग्लिन सडकखण्डको सेतीदोभान पुलबाट लु प्र ०३–००१ ख ००७७ नम्बरको बस खसेको प्रहरीले जनाएको छ ।

इलाका प्रहरी कार्यालय मुग्लिनका प्रमुख प्रहरी निरीक्षक निरला भण्डारीले बस दुर्घटनामा बसमा सवार २८ जनामध्ये २५ जना घाइते भएको र अन्य सकुशल रहेको जानकारी दिनुभयो ।

भण्डारीका अनुसार घाइतेको चितवन मेडिकल कलेजमा उपचार भइरहेको छ । ‘टायर पञ्चर’ हुँदा बस अनियन्त्रित भएर दुर्घटनामा परेको हुनसक्ने प्रहरी निरीक्षक भण्डारीको भनाई छ।