काठमाडौं । नेपालीको दोस्रो ठूलो चाड तिहार सकिएको छ । प्रत्येक वर्ष कार्तिक शुक्ल द्वितीयाका दिन हिजो दाजुभाइले दिदी बहिनीको हातबाट टीका लगाएसँगै तिहार सकिएको हो ।
यद्यपि आज सरकारी कार्यालय बन्द रहेका छन् । सरकारले आज पनि तिहारकै बिदा दिएको छ । १५ गते कुकुर तिहार र लक्ष्मीपूजाको दिनबाट ५ दिन सरकारी कार्यालय बन्द भएको थियो ।
सरकारी कार्यालय मंगलबार मात्रै खुल्नेछन् । आज टीका लगाउनेहरू फर्किने भएकाले भाइटीकाको भोलिपल्ट बिदा दिइएको हो ।
अघिल्लो वर्ष माघ २९ गते प्रकाशित राजपत्रमा कात्तिक १५ देखि १९ गतेसम्म अर्थात् तिहार बिदा उल्लेख छ । १५ गते लक्ष्मीपूजा, १७ गते गोवर्धनपूजा र नेपाल संवत् (म्हपूजा) तथा १८ गते भाइटीका (किजापूजा) को बिदा छ, तर १६ र १९ गतेको बिदाको विवरण भने दिइएको छैन ।
२०७७ सालको तिहारमा तिथिको घटबढका कारण भाइटीका कहिले लगाउने भन्ने विवाद भएको थियो । पञ्चाङ्ग निर्णायक समितिले निकालेको पात्रोमा मंसिर १ गते भाइटीका उल्लेख थियो । नेवार समुदायले मंसिर २ गते किजापूजा गरेको थियो । त्यसैले सरकारले तिहारको बिदा एक दिन थप गरेको थियो । त्यसयता तिथि घटबढ नहुँदा अर्थात् भाइटीकामा विवाद नभए पनि सरकारले तिहारको बिदा एक दिन बढी दिने गरेको छ ।
