काठमाडौं । महिलाविरुद्ध हुने सबै प्रकारका भेदभाव अन्त्यसम्बन्धी संयुक्त राष्ट्रसंघीय समिति (सीड)को सदस्यमा बन्दना राणा फेरि निर्वाचित हुनुभएको छ । चालु कार्यसमितिमा पनि राणा सदस्य हुनुहुन्छ ।

उक्त समितिमा राणा १३७ भोट ल्याएर विजयी हुनुभएको हो । ११ सदस्यका लागि १९ देशले उम्मेद्वारी दर्ता गरेका थिए । तर, तीन देशले उम्मेद्वारी फिर्ता लिएपछि १६ देशबीच प्रतिस्पर्धा भएको थियो ।

उनीहरुलाई १८९ सदस्य देश मध्ये १८८ देशले मतदान गरेका थिए । राणाले तेस्रो बढी मत पाएकी हुन् । १ जनवरी २०२१ देखि नयाँ कार्यकाल शुरु हुनेछ । समितमा रहेर काम गर्ने उहाँ पहिलो नेपाली हुनुहुन्छ । राणाले तीन दशकदेखि लैंगिक समानता र महिला अधिकारको पक्षमा काम गर्दै आउनुभएको छ ।

आफू निर्वाचित भएपछि उहाँले फेसबुकमार्फत सबै मतदाता देशलाई धन्यवाद दिंदै आफू अझै प्रतिबद्ध भएर महिलाविरुद्ध हुने सबै विभेदविरुद्ध काम गर्ने बताउनुभएको छ ।