काठमाडौं । दुई पटकको च्याम्पियन नेपालले साफ यू–२० च्याम्पियनसिपमा आइतबार आज विजयी सुरुआत गरेको छ । सातदोबाटोको एन्फा कम्प्लेक्समा भएको खेलमा नेपालले समूह ए को खेलमा श्रीलंकालाई १–० ले हराएको हो ।
यो जितपछि नेपालको सेमिफाइनल प्रवेश बलियो भएको छ । नेपालको तीन अंक भएको छ भने श्रीलंका शून्य अंकमा रह्यो । अब नेपालले बिहीबार हुने आफ्नो लिगको अन्तिम खेलमा बंगलादेशको सामना गर्नेछ ।
नेपालका जितमा नीराजन धामीले २४ औं मिनेटमा गरेको गोल नै निर्णायक रह्यो । पूरा खेल अवधिमा श्रीलंकाले नेपालविरुद्ध बलियो आक्रमण बुन्न सकेन । नेपालले भने दुई बलियो अवसर गुमाएको थियो ।
ती दुवै अवसर समीर तामाङले गुमाएका हुने । उनले पोस्टको नजिकबाट गरेको दुवै प्रहार बाहिरिएको थियो । यस्तै खेलको सुरुमै नीराजनको प्रहारले पोस्टको दिशा लिए पनि त्यो अफ साइड रह्यो ।
उनैले खेलको अन्त्यतिर गरेको पोस्टमा लागेको थियो । भोलि सोमबार समूह बी का खेलमा डिफेन्डिङ च्याम्पियन भारत र भुटान खेल्नेछन् ।
