काठमाडौं। नारायणगढ मुग्लिङ सडकखण्डअन्तर्गत पर्ने चितवनको सिमलताल पहिरोमा परेर त्रिशूलीमा बेपत्ता बसका अर्का थप एक यात्रुको पनि शव फेला परेको छ।

भरतपुर महानगरपालिका–२६ शिशुवार क्षेत्रमा नारायणी नदीको किनारमा एक पुरुषको शव आज भेटिएको चितवन प्रहरीले जानकारी दिएको छ। शवको सनाखत भने हुन बाँकी छ ।

शवलाई भरतपुर अस्पताल ल्याएर पोष्टमार्टम गरिँदैछ। योसँगै सिमलताल दुर्घटनामा बेपत्ता बनेका २० जनाको शव भेटिएको छ। जसमध्ये १४ जनाको सनाखत भएर परिवारले शव बुझेका छन्।

गत असार २८ गते विहान नारायणगढ मुग्लिन सडकखण्ड अन्तर्गत भरतपुर महानगरपालिका–२९ मा सिमलतालमा पहिरोले दुई वटा यात्रुबाहक बस बगाएको थियो। ६२ जना यात्रुसहित बस त्रिशूलीमा बेपत्ता भएको थियो। नदीमा अझै ४२ यात्रुको अवस्था अज्ञात छ।