काठमाडौं । अर्घाखाँचीको छत्रदेव गाउँपालिकाले कृषि र खानेपानीलाई पहिलो प्राथमिकतामा राखेर आउँदो वर्षका लागि नीति तथा कार्यक्रम प्रस्तुत गरेको छ । देशभरिका स्थानीय तहमा आगामी आर्थिक वर्ष २०८१/०८२ का लागि नीति तथा कार्यक्रम प्रस्तुत हुन सुरु भएसँगै छत्रदेव गाउँपालिकाले पनि आगामी आर्थिक वर्षका लागि नीति तथा कार्यक्रम प्रस्तुत गरेको छ । शुक्रबार गाउँपालिका अध्यक्ष चन्द्रमान श्रेष्ठले नयाँ आर्थिक वर्षका लागि नीति तथा कार्यक्रम प्रस्तुत गर्नुभएको हो ।
छत्रदेव गाउँपालिकाको १८औं अधिवेशनबाट गाउँपालिका अध्यक्ष श्रेष्ठले आगामी आर्थिक वर्षका लागि नीति तथा कार्यक्रम प्रस्तुत गर्नुभएको हो । उहाँले प्रस्तुत गरेको नीति तथा कार्यक्रममा पालिकाको विकास सुशासन र समृद्धिलाई प्राथमिकतामा राखेको बताउनुभएको छ।
गाउँपालिका भित्र रहेका असहाय गरिब दुखी र बिरामीलाई विशेष सहयोग गर्ने नीति तथा कार्यक्रममा उल्लेख गरिएको छ । यस्तै शिक्षालाई प्रविधिमैत्री र गुणस्तरीय बनाउने र नागरिकका समस्या समाधानका लागि यो नीति तथा कार्यक्रमले महत्त्वपूर्ण भूमिका खेल्ने अध्यक्ष श्रेष्ठको भनाइ छ ।
आगामी आर्थिक वर्षका लागि नीति तथा कार्यक्रम प्रस्तुत गरिरहँदा संसद्कै झल्को दिने गरी पालिका भित्रका सबै वडा टोलका स्थानीयवासीलाई समेटेको अध्यक्ष श्रेष्ठको भनाइ छ ।
