काठमाडौं । कपिलवस्तुबाट काठमाडौं आउँदै गरेको यात्रुवाहक बस त्रिशूली नदीमा खसेको छ । काठमाडौं आउँदै गरेको लु २ ख २१२१ नम्बरको बस बुधबार बिहानै धादिङको गजुरी गाउँपालिका–५ घाटबेशीस्थित पृथ्वी लोकमार्गबाट त्रिशूलीमा खसेको जिल्ला प्रहरी कार्यालय धादिङले जनाएको छ ।
दुर्घटनामा चार जनाको मृत्यु भएको कार्यालयका प्रवक्ता डीएसपी सन्तुलाल जैसवारले बताउनुभयो । शव निकाल्ने काम भइरहेकोले मृतकको यकिन संख्या भने अझै आईनसकेको उहाँले बताउनुभएको छ। ‘३५ जनाको जीवितै उद्धार गरिएको छ’, डीएसपी जैसवारले भन्नुभयो, ‘उद्धारको काम जारी छ । चार/पाँच जनाको डेथ भएको छ । शव निकाल्ने काम भइरहेकोले यकिन भइसकेको छैन ।’
बसमा ४५ जना यात्रु सवार रहेको खुलेको उहाँले बताउनुभयो। बस आफैं अनियन्त्रित भई त्रिशूलीमा खसेको प्रहरीको प्रारम्भिक अनुमान छ । उहाँका अनुसार बस सडकबाट सय मिटर तल नदीमा खसेको छ ।
उद्धारका लागि विपद् व्यवस्थापन तालिम शिक्षालय कुरिनटारबाट प्रहरी निरीक्षकको कमान्डमा ६ जना गोताखोरसहित २० जनाको टोली खटिएको छ । टोलीले उद्धारको काम गरिरहेको छ ।
