काठमाडौं । काठमाडौं आउँदै गरेको यात्रुवाहक बस त्रिशूली नदीमा खसेको छ । कपिलवस्तुबाट काठमाडौं आउँदै गरेको लु २ ख २१२१ नम्बरको बस आज बिहान धादिङको गजुरी गाउँपालिका–५ घाटबेशीस्थित पृथ्वी लोकमार्गबाट त्रिशूलीमा खसेको प्रहरीले जनाएको छ ।
प्रहरीका अनुसार दुर्घटनामा केही मृत्यु भएको छ । तर, यकिन विवरण आउन बाँकी रहेको इलाका प्रहरी कार्यालय गजुरीले जनाएको छ ।
दुर्घटनास्थलमा सशस्त्र प्रहरी बलको टोली पुगेको छ । सशस्त्र प्रहरी बल नेपाल विपद् व्यवस्थापन सुरक्षा बेश आदमघाटबाट खटिएको टोली घटनास्थल पुगेको हो ।
टोलीले १३ जनाको जीवितै उद्धार गरेको जनाएको छ । उनीहरूलाई उपचारका लागि गजुरी अस्पतालतर्फ पठाएको प्रहरीको भनाइ छ । उद्धार कार्य जारी छ ।
