काठमाडौं। जाजरकोट केन्द्रबिन्दु भएर गएको भूकम्पमा ११ जिल्ला प्रभावित भएका छन् । जसमा जाजरकोट, रुकुम पश्चिम, रुकुम पूर्व, सल्यान, रोल्पा, नवलपरासी पूर्व, दैलेख, दाङ, बैतडी, जुम्ला र प्युठान भूकम्पबाट प्रभावित बनेको गृह मन्त्रालयले जनाएको छ । भूकम्पमा परि हालसम्म १ सय ५७ जनाको मृत्यु भएको छ । शवको आवश्यक प्रक्रिया पूरा गरी आफन्तलाई बुझाइएको छ ।
यता, भूकम्पपछि बसेको मन्त्रिपरिषद् बैठकको आकस्मिक बैठकले विभिन्न १८ वटा निर्णय गरेको छ। आज बिहान बसेको उद्धार, राहत केन्द्रित बैठकमा तत्काल मृतकका परिवारलाई २ लाखका दरले राहतस्वरूप उपलब्ध गराउने, घाइतेको निःशुल्क उपचार गर्ने, राहत सामग्रीलाई एकद्वार प्रणालीबाट संकलन तथा वितरण गराउँदै व्यवस्थित गर्नेलगायतको निर्णय गरिएको सञ्चारमन्त्री रेखा शर्माले जानकारी दिनुभयो ।
खोज, उद्धार, तत्काल राहत र घाइतेहरुको निःशुल्क उपचारमा प्राथमिकता दिने, साथै भूकम्पबाट विस्थापित भएका परिवारलाई अस्थायी आवास, खाद्यान्न र सुरक्षा प्रबन्ध मिलाउने पनि निर्णय भएको छ । भौतिक पूर्वाधार निर्माणका साथै सहयोगी सबैलाई सरकारले धन्यवाद ज्ञापन गर्ने निर्णय गरेको छ ।
अन्तर्राष्ट्रिय समुदायले पनि भूकम्प पीडितलाई राहत र उद्दारका लागि उदारता देखाएका छन् । नेपाल भूकम्पीय दृष्टिकोणले जोखिममा रहेकोले भौतिक संरचना निर्माण र बस्ती स्थानान्तरणलाई एकीकृत परियोजनाका रुपमा अगाडि बढाउन आवश्यक देखिन्छ । हामीसँग थप जानकारीका लागि जिल्ला प्रशासन कार्यालयका जाजरकोटका सूचना अधिकारी हरिचन्द्र शर्मा जोडिनुभएको छ ।
