काठमाडौं । सरकारले कोरोना पोजेटिभ भएका व्यक्तिहरुलाई बाहिर हिँडडुल नगर्न आग्रह गरेको छ । संक्रमितहरु हिडडुल गरेको पाइएमा ६ महिनासम्म जेल सजाय हुने चेतावनी स्वास्थ्य मँत्रालयले दिएको छ ।

संक्रामक रोग ऐन अनुसार पोजेटिभ देखिएमा ६ महिनाको जेल सजाय हुने स्वास्थ्य तथा जनसंख्या मन्त्रालयका प्रवक्ता डा. गौतमले बताउनुभयो । यसका लागि अनुगमनमा सहयोग गर्न घर परिवार र छिमेकीलाई मन्त्रालयले अनुरोध गरेको छ ।

कारवाहीका लागि गृह मन्त्रालय र जिल्ला प्रशासन कार्यालयलाई सूचना दिइएको उहाँले बताउनुभयो । दशैं तिहारमा भिडभाड नगर्न पनि मन्त्रालयले आग्रह गरेको छ । अनलाइन वा फोनबाट नै यो वर्षको दशैं तिहारमा आशिर्वाद लिन सरकारले सबैमा आग्रह गरेको छ ।