तेह्रथुम । तेह्रथुममा आफ्नै घरमा आगो लगाउने एक युवा पक्राउ परेका छन् । छथर गाउपालिका–६ सुदाप स्थित महाबीरमा घरायसी विवादका कारण गएराती आफ्नै घरमा आगो लगाउने २८ वर्षीय भानु बस्नेत पक्राउ परेका हुन् ।

जिल्ला प्रहरी कार्यलय तेह्रथुमका प्रहरी निरीक्षक छिपिन्जो भोटेले दिएको जानकारी अनुसार उनले लगाएको आगलागीबाट तीनवटा उन्नत जातका गाई, दशवटा बाख्रा, अन्नपात, लत्ताकपडा, भाडाकुँडा सबै जलेर नष्ट भएकाा थिए । गएराती ११ बजे घरमा आगो लगाएर फरार भएका भानुलाई आज बिहान प्रहरीले स्थानीय चप्परीचौकबाट पक्राउ गरेको हो ।

आगोलागीबाट ३० लाख बराबरको क्षति भएको प्रहरीको अनुमान छ । दुईदिन अघि घरका परिवार सबैलाई मार्ने धम्की दिएर घरबाट बाहिर निस्किएका भानुले शनिबार राती परिवार सुतिरहेको अवस्थामा आगो लगाएका थिए ।