काठमाडौं ।पोखरामा भएको विमान दुघर्टनाबारे अध्ययन गर्न फ्रान्सबाट आएको विज्ञको टोलीले काम सुरु गरेको छ। फ्रान्सबाट एटीआर विमान निर्माता कम्पनीको नौ सदस्यीय विज्ञ टोली नेपाल आएको थियो । सो टोली घटनास्थलमा पुगेर काम सुरु गरेको हो ।

विज्ञ टोलीले घटनास्थलको अवलोकन गर्नुको साथ उडानमा संलग्नहरुसँग पनि छलफल गर्ने छ र दुर्घटनाको कारण पत्ता लगाउने छ।नेपालमा पहिलो पटक एटीआर विमान दुर्घटना भएको हो। त्यसैले विमान निर्माता कम्पनीले दुर्घटनाप्रति चासो दिएको हो ।

यता नेपाल सरकारले पनि विमान दुर्घटनापछि पूर्वसचिव नागेन्द्र घिमिरेको संयोजकत्वमा बनाएको पाँच सदस्यीय दुर्घटना जाँच आयोगले पनि पोखरामै रहेर काम थालेको संस्कृति, पर्यटन तथा नागरिक उड्डयन मन्त्रालयले जनाएको छ ।

जहाँजको ब्ल्याक बक्सको रिपोर्ट आउन ढिला हुने भएकाले कारण पत्ता लाग्न भने समय लाग्ने भएको छ ।