बझाङमा पहिरोमा परि बेपत्ता भएकामध्ये तीन जनाको शव भेटिएको छ । केदारस्युँ गाउँपालिका ८ मल्लेसीमा गएको पहिरोमा परेर बेपत्ता भएकामध्ये अहिलेसम्म ३ जनाको शव भेटिएको गाउँपालिकाका निमित्त प्रशासकीय प्रमुख घनराज जोशीले जानकारी दिनुभयो ।

उहाँका अनुसार त्यहाँको एउटा पावरहाउस सगै १८ वटा घर पहिरोले पुरिएका छन । उता जिल्ला सदरमुकामबाट नेपाल प्रहरी र सशस्त्र प्रहरीको टोली तथा कालंगा जलविद्युत आयोजनाको सुरक्षार्थ खटिएको नेपाली सेनाको टोली घटनास्थल पुग्न प्रयासरत रहेको प्रमुख जिल्ला अधिकारी कमलराज पाण्डे बताउनुभयो ।

पहिरोले त्यो गाउँ जाने बाटोसमेत बगाएकोले बाटो बनाएर घटनास्थल जाने प्रयास गरिरहेको प्रहरीले जनाएको छ । उद्धार टोली त्यहाँ पुग्नका लागि अझै समय लाग्न सक्ने बताइएको छ ।