काठमाडौं । दाङमा बबई नदीमा नुहाउने क्रममा डुबेर बेपत्ता भएका दुई किशोरीको शव फेला परेको छ । आइतबार(आज) दिउँसो साढे ३ बजे प्रहरी र स्थानीय बासिन्दाको टोलीले शव फेला पारेका हुन् ।
हिजो बबई नदीमा नुहाउन गएका दंगीशरण गाउँपालिका–२ का १४ वर्षीया रमा शाह र सल्यानको दमाचौरका १४ वर्षीया गोमा चन्दको शव करिब २७ घण्टापछि फेला पारेको इलाका प्रहरी कार्यालय तुलसीपुरका प्रमुख डीएसपी पुष्पराज मल्लले जानकारी दिनुभयो ।
तुलसीपुर उपमहानगरपालिका–११ को मोतीपुर नजिकै हिजो दिउँसो १ बजेतिर बबई नदीमा नुहाउन गएका तीन जनामध्ये दुई जना बेपत्ता भएका थिए ।
