छविलाल पाण्डे, बाग्लुङ । निरन्तरको वर्षासंगै गएराति आएको बाढीले बागलुङमा ११ जनाको मृत्यु भएको छ भने २७ जना बेपत्ता भएका छन्।ढोरपाटन नगरपालिका ९ भुजीखोला आसपासमा रहेका रहेका बस्तीमा बाढी पस्दा ७५ घर पुरिएका छन् । बेपत्ता भएका ३८ जनामध्ये अहिलेसम्म ११ शव फेला परेको हो ।

पहिरोमा परि मृत्यु हुने एकजना बाहेक अन्यको सनाखत हुन सकेको छैन । राति १२ बजेतिर देउराली र सुपुरदुङ क्षेत्रमा खसेको पहिरोमा त्यहाँका सडकसमेत क्षतविक्षत भएको छ । बिहान साढे ७ बजे इलाका प्रहरी कार्यालय बुर्तिवाङका प्रहरी निरीक्षक प्रकाशसिंह भण्डारी नेतृत्वको टोली घटनास्थल पुगेपछि स्थानीयसहित उद्धार सुरु गरिएको हो ।

बेपत्ताको नेपाल प्रहरी, नेपाली सेनासमेतको सहयोगबाट खोजी भइरहेको प्रमुख जिल्ला अधिकारी सुरेश न्यौपानेले जानकारी दिनुभएको छ । घटनास्थल सदरमुकामबाट १ सय ३० किमी पश्चिममा पर्छ । पहिरो खसेको थाहा पाएर पनि रातभर फोन र विद्युत् अवरुद्ध भएकाले उद्धार गर्न कठिनाइ भएको स्थानीयले जनाएका छन् ।