छविलाल पाण्डे, बागलुङ । बागलुङको पश्चिम क्षेत्रमा छुट्टाछुट्टै घटनामा तीन जनाको ज्यान गएको छ । आज दिउँसो बडिगाड खोलाले बगाउँदा ढोरपाटन नगरपालिका –१ बुर्तिबाङमा एक बालकको ज्यान गएको छ ।

ढोरपाटन नगरपालिका –४ का प्रेमबहादुर सिर्पालीका १० बर्षीय छोरा दीलिप विकको वडिगाड नदीमा पौडी खेल्ने क्रममा बगेर ज्यान गएको हो ।

घरदेखि बुर्तिबाङस्थित दिदीको घरमा बस्न आएका उनी साथीहरुसँग नजिकैको पौडीखेल्न गएको अवस्थामा नदीमा बगेकोे स्थानियले बताएका छन् ।

बालकको शव करिब दुई किलोमिटर टाढा खप्तरीबाङस्थित नदी किनारमा स्थानियले फेला पारेका थिए ।

त्यसैगरी, जिल्लाको निसीखोला गाउँपालिका –६ मा नदीले वगाउँदा एक बालिका वेपत्ता भएकी छिन् । स्थानीय राजीव बुढाकी सात वर्र्षीय छोरी सञ्जिता बुढामगरलाई मंगलबार साँझ भल्कोट खोलाले बगाएको हो ।

खोला किनारमा खेल्दै गर्दा उनलाई खोलाले बगाएको र उनको खोजी कार्य जारी रहेको इलाका प्रहरी कार्यालय बुर्तिबाङले जनाएको छ ।

चट्याङले एकको ज्यान गयो

मंगलबार साँझ परेको चट्याङका कारण वडिगाड गाउँपालिका –१० मा एक जनाको ज्यान गएको छ । अन्य ३ जना घाइते भएका हुन् ।

चट्याङले बडीगाड गाउँपालिका –१० दर्लिङका ५० वर्षीय अशोक बुढाको मृत्यु भएको जिल्ला प्रहरी कार्यालय बागलुङका सुचना अधिकारी प्रहरी नायब उपरीक्षक राजेन्द्र रेग्मीले जानकारी दिनुभएको छ । चट्याङले स्थानिय किरण बुढा, खेमबहादुर विक र तीर्थमान सुनार घाइते भएका छन् ।