काठमाडौंका १ सहित प्रदेश २ मा थप ५० जनामा कोरोना संक्रमण देखिएको छ । वीरगञ्जस्थित नारायणी अस्पतालको प्रयोगशालामा गरिएको परीक्षणमा ५० जनामा कोरोना संक्रमण पुष्टि भएको हो । संक्रमितहरु १५ देखि ५६ वर्ष उमेर समुहका रहेका छन् ।

शुक्रबार ४ सय ३३ वटा स्वाब संकलन गरेर परीक्षण गर्दा ५० जनामा कोरोना संक्रमण पुष्टि भएको नारायणी अस्पतालका प्रवक्ता डाक्टर अतुलेस चौरसियाले जानकारी दिनुभयो।

उहाँका अनुसार पर्साका ३१, बाराका ८ जना, रौतहटको १ जना, सर्लाहीका २ जना, महोत्तरीका ३ जना, धनुषाका ४ जना र काठमाडौंको १ जनामा कोरोना संक्रमण देखिएको छ। यसअघि पर्सामा ४ सय ५८ जना महिलासहित २ हजार ६४ जनामा कोरोना संक्रमण पुष्टि भइसकेको छ। भने ५ सय ८६ जना कोरोनामुक्त भई घर फर्किएका छन्।

अहिलेसम्म १९ हजार १ सय ३० जनाको स्वाब संकलन भएकोमा ३ सय ४० जनाको पीसीआर रिपोर्ट आउन बाँकी छ । ३६ जनाको कोरोना संक्रमणबाटै मृत्यु भएको पुष्टि भइसकेको छ।