काठमाडौं । कास्कीको मादी गाउँपालिकाको माथिल्लो भेगमा रहेको क्याँदू खोला पहिरोका कारण थुनिएपछि तल्लो तटीय क्षेत्र जोखिममा परेको छ ।
पालिकाको दुर्गम भेगको २ ठूला पहाडको बीचमा पहिरो गएर शनिबारदेखि खोला थुनिएको मादी गाउँपालिका-१ का वडाध्यक्ष देवीजंग गुरुङले जानकारी दिनुभयो ।
हुँगुमा सिक्लेसका केही स्थानीय भेडा चरणसँगै होटेल व्यवसाय गर्छन् । नेपालकै सबैभन्दा होचो स्थानको हिमताल कफुचे ताल त्यही बाटो भएर जाने भएकाले त्यहाँ मादिवासीले होटेल व्यवसाय गरेका हुन् ।
हुँगुको नजिकै क्यादु खोला बग्छ । त्यहाँ होटेल व्यवसायीले त्यही खोलाको पानी प्रयोग गर्दै आइरहेका छन् । तर, शनिबार साँझ करिब ५ बजेबाट खोला आउन छाडेपछि स्थानीय होटेल व्यवसायीले गाउँपालिकालाई खबर गरेका थिए ।
हेलिबाट हेर्दा पहिरोले खोला थुनिएर बनेको ताल सानो देखिएपनि गहिरो हुन सक्ने अनुमान गाउँपालिकाको छ ।
क्यादू खोला मादी नदीमा आएर मिसिने भएकाले मादीसँग जोडिएका बस्ती बढी जोखिममा रहेको वडाध्यक्ष गुरुङले जानकारी दिनुभयो । उहाँका अनुसार मादीको वडा नम्बर १, ५, ९, ११ र १२ नम्बर वडा सबैभन्दा बढी जोखिममा छन् ।
