काठमाडौं । पृथ्वी राजमार्गअन्तर्गत मुग्लिङ–आँबुखैरेनी सडक खण्डमा अबको ४ दिन ठुला सवारीसाधन सञ्चालनमा रोक लगाइने भएको छ।
तनहुँको आँबुखैरेनी गाउँपालिका–४, साँखरस्थित पावर हाउस नजिक वर्षाका कारण शुक्रबार(आज) बिहान सडक भासिएका कारण ठुला सवारीको आवागमनमा रोक लगाइएको हो।
अहिले सडक एकतर्फी रुपमा मात्रै सञ्चालनमा ल्याइएको छ। एकतर्फी रुपमा साना सवारी साधन मात्रै सञ्चालन गर्न मिल्ने भएकाले भित्तोतर्फको भाग काटेर सडक फराकिलो बनाउन लागिएको जिल्ला प्रहरी कार्यालय तनहुँले जानकारी दिएको छ।
तनहुँ प्रहरी प्रमुख प्रहरी उपरीक्षक राजेन्द्रबाबु रेग्मीका अनुसार सडक विभागले भित्तो काटेर सडक फराकिलो बनाउनुपर्ने बताएका कारण कम्तीमा ४ दिनका लागि ठुला सवारीको आवागमन रोकेर सडक फराकिलो बनाउन लागिएको हो।
आज बिहान सडक भासिदा सो ठाउँमा बा १० च ४६४९ नम्बरको कार र बा ३३ प १०८१ नम्बरको मोटरसाइकल पुरिएको थियो। सडक भासिएको स्थानमा २ वटा शव भेटिएको प्रहरीले जानकारी दिएको छ।
