काठमाडौं । काठमाडौं उपत्यकाको फोहोर व्यवस्थापनमा स्थानीयले अवरोध गरेपछि उत्पन्न विवाद मिलाउन भोलि वार्ता हुने भएको छ ।

भोलि हुने वार्तामा सरकारको तर्फबाट शहरी विकास मन्त्री रामकुमारी झाँक्री, नेपाली कांग्रेसका नेता डा.प्रकाशशरण महत, संघर्ष समितिका संयोजक श्रीराम ढुंगाना लगायत फोहोर मैलाबाट प्रभावित स्थानका जनप्रतिनिधिहरु सहभागी हुने जनाईएको छ ।

यसैगरी, काठमाडौंको फोहोर विसर्जनका लागि बन्चरेडाँडा गएका कन्टेनर आज पनि फिर्ता भएका छन् । स्थानीयले सडकमा छेकबार लगाएपछि कन्टेनर फर्किएका हुन्। हिजो पनि स्थानीयको अवरोधपछि कन्टेनर फोहोरसहित फिर्ता भएका थिए ।

उपत्यकाको फाहोर करीब २ हप्तादेखि उठ्न सकेको छैन् । फोहोरले शहर नै दुर्गन्धित भएको छ । सोमबार मन्त्रालय, काठमाडौ महानगर र स्थानीयबीच सहमति भएपनि स्थानीयहरुले फोहोर विसर्जन गर्न दिएका छैनन् । दैनिक अवरोध सिर्जना गरेका छन् ।

यसैबीच, बञ्चरेडाँडाबाट हिजो दिउँसो पक्राउ परेका संघर्ष समितिका संयोजक श्रीराम ढुंगानासहित तीन जनालाई प्रहरीले आज बिहान छाडेको छ ।