काठमाडौं । आइतबार पोखराबाट जोमसोम जाँदै गरेको मुस्ताङको मानापाथी हिमालको फेदीमा दुर्घटनाग्रस्त हुँदा मृत्यु भएका १० जनाको शव बोकेर नेपाली सेनाको हेलिकोप्टर काठमाडौंका लागि उडेको छ ।
आइतबार तारा एयरको ट्वीनअटर विमान दुर्घटना हुँदा उक्त विमानका सबै २२ जना यात्रुको मृत्यु भएको थियो ।
मृत्यु भएकामध्ये पहिलो चरणमा १० जनाको शव लिएर नेपाली सेनाको हेलिकोप्टर काठमाडौंका लागि उडेको नेपाली सेनाका प्रवक्तासमेत रहेका सहायक रथी नारायण सिलवालले जानकारी दिनुभयो ।
आइतबार बिहान पोखराबाट जोमसोमका लागि उडान भरेको तारा एयरको ट्वीनअटर विमान एक दिनपछि सोमबार मुस्ताङको थासाङ गाउँपालिका २ को सानुसरे भन्ने स्थानमा १४,५०० फिटको उचाइमा दुर्घटनाग्रस्त अवस्थामा फेला परेको थियो ।
