सुदूरपश्चिमका पहाडी समुदायले आज ओल्के पर्व मनाउँदै छन् । प्रत्येक वर्षको भदौ १ गतेका दिन मनाइने यो पर्वमा आफ्ना आफन्तहरूलाई सम्मान स्वरुप कोशेली तथा उपहार सहित ढोग भेट गर्न जाने चलन रहेको छ । यो पर्वमा विशेषगरी ओल्कोको रूपमा फलफुल, सागपात, अन्न, दूध, दही, घिऊ, गूड, पक्वान आदि मान्यजन र आफन्तकहाँ पठाइन्छ ।

पछिल्लो समयमा लुगाकपडा, रुपैयाँ पैसा वा यस्तै अन्य उपहार समेत दिने प्रचलन बढ्दै गएको छ । यसका अतिरिक्त ईष्टकुल देवताको मन्दिरमा नयाँ अन्नबालीको ओल्को समेत न्वागीका रुपमा चढाइन्छ । त्यस्तै, गाउँका गोठालो जाने केटाकेटीहरुले रूखका हांगाविंगा, झ्याङ तथा अन्य बोटबिरुवा काटेर एक ठाउँमा थुप्रो बनाई बुढी हाल्ने गर्दछन् र त्यसलाई असोज संक्रान्तिको साँझ पोलेर बूढी पोल्ने पर्व मनाउने परम्परा पनि रहेको छ ।