काठमाडौँ । दाङको तुलसीपुर उपमहानगरपालिका–५ ‘ङ’ लाइन स्थित एक चप्पल गोदाममा आगलागी हुँदा पाँच जनाको मृत्यु भएको छ । आज बिहान २ बजेतिर आगलागी हुँदा पाँच जनाको मृत्यु भएको इलाका प्रहरी कार्यालय तुलसीपुरका प्रहरी नायब उपरीक्षक श्यामु अर्यालले जानकारी दिनुभयो ।

प्रहरीका अनुसार आगलागी परी मृत्यु हुनेहरुमा १३ वर्षीया सजिता खातुन, १४ वर्षीय हसन बकस, १५ वर्षीय मसिन बकस, ४० वर्षीय नजरदिन अली र पाँच वर्षीय अबिददिन अलि रहेका छन् । आगो नियन्त्रणमा आएपछि बिहान साढे ७ बजेतिर शव निकालिएको प्रहरी नायब उपरीक्षक अर्यालले बताउनुभयो । आगलागी हुँदा तेस्रो तलामा रहेका उनीहरुको निसास्एिर मृत्यु भएको प्रहरीको अनुमान छ ।

इरम फुटवेयर चप्पल गोदाममा आगलागी भएको हो । विद्युतको मिटर पड्किदा आगलागी भएको प्रहरीले बताएको छ । बिहान पौने दुई बजेतिर गस्तीमा गएको प्रहरीको टोलीले आगो लागेको देखेका थिए । त्यसपछि नियन्त्रणका लागि प्रयास भए पनि करिब ५ घन्टापछि मात्र आगो नियन्त्रणमा आएको हो ।