जाजरकोट : जाजरकोटमा मिनी ट्रक दुर्घटना हुँदा २ जनाको मृत्यु भएको छ । दुर्घटनामा ७ जना घाइते भएका छन् भने १ जनाको अवस्था अज्ञात रहेको जिल्ला प्रहरी कार्यालय जाजरकोटले जानकारी दिएको छ ।

प्रहरीका अनुसार सुर्खेतदेखी जाजरकोटको जुनिचाँदे जाँदै गरेको बा ५ ख २५०१ नम्बरको मिनी ट्रक गएराति जाजरकोटको रिठेखोला बाबिया टाकुरामा दुर्घटना भएको हो । मृत्यु हुनेमा ठेगाना नखुलेका दिलबहादुर शाही छन् । अर्का मृतकको पहिचान खुल्न सकेको छैन । यस्तै, बेपत्ता भएकाको पनि पहिचान खुल्न नसकेको प्रहरीले जानकारी दिएको छ ।

घाइते हुनेमा आसिका खड्का, करिश्मा रावत, जुनिचाँदेका दीपकबहादुर शाही, धनबहादुर रावत, नवीन सिंह र निराजन खड्का छन् । घाइतेमध्ये धनबहादुर रावत मिनी ट्रकका चालक रहेका छन् । प्रहरीका अनुसार मिनी ट्रकमा १० जना सवार थिए । दुर्घटनाको कारण भने खुल्न नसकेको प्रहरीले जनाएको छ ।